रसुवा भोटेकोशी बाढीमा बेपत्ता बर्दियाका ७४ जनाको विवरण स्थानीय तहबाट प्रमाणिकरण भई प्राप्तभएकाहरुको जिल्ला विपद् जोखिम न्यूनीकरण तथा व्यवस्थापन समितिबाट सिफारिसः
तस्बिर :
गुलरिया, बर्दिया । जिल्ला विपद् जोखिम न्यूनीकरण तथा व्यवस्थापन समिति, बर्दियाको बैठकले रसुवा भोटेकोशी बाढीमा बेपत्ता भएका बर्दिया जिल्लाका स्थायी बासिन्दामध्ये ७४ जनाको नामावली तथा विवरण प्रमाणीकरणका लागि सिफारिस गरेको छ। मिति २०८३/०७/२० गते जिल्ला प्रशासन कार्यालय बर्दियामा बसेको जिल्ला विपद् जोखिम न्यूनीकरण तथा व्यवस्थापन समितिको बैठकमा 'बर्दिया जिल्ला स्थायी ठेगाना भई रसुवा भोटेकोशी बाढीमा बेपत्ता व्यक्तिको आधिकारिक विवरण यकिन गर्ने प्रक्रिया, २०८३' बमोजिम सञ्चालन गरिएको विवरण संकलन तथा प्रमाणीकरण प्रक्रियाको समीक्षा गर्दै उक्त नामावली सिफारिस गरिएको हो।
निर्धारित प्रक्रियाअनुसार बेपत्ता व्यक्तिका नजिकका हकदारहरूले तोकिएको ढाँचामा आवश्यक कागजात तथा स्वघोषणासहित सम्बन्धित वडा कार्यालयमा निवेदन पेस गर्न वडा कार्यालयबाट ५ (पाँच) दिनको सूचना प्रकाशन गरिएको थियो। सो अवधिमा प्राप्त निवेदन तथा कागजातहरू सम्बन्धित स्थानीय तहमा सिफारिससहित पठाइएको थियो।
त्यसपछि सम्बन्धित स्थानीय तहबाट पुनः ३ (तीन) दिनको दाबी-विरोधसम्बन्धी सूचना प्रकाशन गरी प्राप्त विवरण तथा कागजातमाथि आवश्यक जाँचबुझ गरिएको थियो। स्थानीय विपद् जोखिम न्यूनीकरण तथा व्यवस्थापन समितिको बैठकबाट प्रमाणिकरण भई जिल्ला विपद् जोखिम न्यूनीकरण तथा व्यवस्थापन समितिमा प्राप्त विवरणअनुसार ८ वटै स्थानीय तहबाट जम्मा ७४ जनाको नामावली तथा विवरण सिफारिस भएको हो।
सिफारिस गरिएका बेपत्ता व्यक्तिहरूको स्थानीय तहगत विवरण देहायबमोजिम रहेको छः
१. गुलरिया नगरपालिका – २ जना
२. गेरुवा गाउँपालिका – १४ जना
३. ठाकुरबाबा नगरपालिका – १० जना
४. बढैयाताल गाउँपालिका – ३ जना
५. बाँसगढी नगरपालिका – ७ जना
६. बारबर्दिया नगरपालिका – २५ जना
७. मधुवन नगरपालिका – २ जना
८. राजापुर नगरपालिका – ११ जना
जम्मा – ७४ जना।
यसरी वडा कार्यालयबाट सूचना प्रकाशन, निवेदन संकलन, स्थानीय तहबाट दाबी-विरोधको सूचना प्रकाशन तथा स्थानीय विपद् जोखिम न्यूनीकरण तथा व्यवस्थापन समितिबाट प्रमाणिकरण गरी विवरण सिफारिस गर्ने प्रक्रिया पूरा गरिएको छ।
जिल्ला प्रशासन कार्यालय बर्दियाले सम्बन्धित सबै निकाय तथा सरोकारवालाहरूको समन्वय र सहकार्यमा बेपत्ता व्यक्तिहरूको विवरण यकिन गर्ने कार्यलाई निर्धारित प्रक्रियाअनुसार अघि बढाएको छ। यस प्रक्रियाले प्राप्त विवरणको विश्वसनीयता, पारदर्शिता र आधिकारिकता सुनिश्चित गर्न सहयोग पुग्ने अपेक्षा गरिएको छ।
