जिल्ला प्रशासन कार्यालय बर्दियाको अत्यन्त जरुरी विपद् सम्बन्धी सूचना।
8 महिना अगाडी
2082-06-18
मिति २०८२ साल असोज १८ देखि २० गतेसम्म देशका विभिन्न स्थानमा भारी देखि अति भारी बर्षाको सम्भावना रहेको र हाल देशका विभिन्न भागमा बर्षा समेत भैरहेको हूँदा बाढी, डुबान, कटान र पहिरो जस्ता प्राकृतिक प्रकोपहरूबाट जनधनमा ठूलो क्षति हुने सम्भावना बढेको छ। यस प्रकारको विपद्को व्यवस्थापन र जनसुरक्षाको सुनिश्चितता गर्नका लागि जिल्ला प्रशासन कार्यालय, बर्दियाले नेपालको संविधान, २०७२ ले प्रत्येक नागरिकलाई सुरक्षित जीवन र वातावरणीय अधिकारको सुनिश्चितताका साथै स्थानीय प्रशासन ऐन, २०२८ र विपद् जोखिम न्यूनीकरण तथा व्यवस्थापन ऐन, २०७४ बमोजिम विशेष सतर्कता अपनाउन हुन यो अत्यन्त जरुरी सूचना जारी गरेको छ।
- लामो दूरीका सार्वजनिक तथा निजी सवारी साधनहरू तत्कालका लागि नचलाउने।
- आवश्यक परे नजिकैको सुरक्षित स्थलमै मात्र आवागमन गर्न सकिनेछ।
- जिल्लाबासी सबैलाई घरमै सुरक्षित रहनुहुन, जोखिमयुक्त किनारा, डुबान क्षेत्र, पुल–पुलिया र नदी नजिकका बस्तीमा नजानुहुन ।
- विद्यालय, मेला–महोत्सव तथा भीडभाड हुने कार्यक्रमहरू तत्कालका लागि स्थगित गर्ने।
- बाढी डुबान वा पहिरोको उच्च जोखिम देखिएका क्षेत्रका बासिन्दाहरुले सुरक्षित स्थानको पहिचान गरी तयारी अवस्थामा रहने एवम् स्थानीय तह, सुरक्षा निकाय एवम् संचारका माध्यमहरु सुन्ने तथा हेरि सतर्क रहने।
- आ-आफ्नो सुरक्षाका लागि प्रत्येक नागरिकले आवश्यक खाद्यान्न, औषधि तथा टर्च, बत्ती जस्ता वस्तु सुरक्षित राख्नुपर्छ।
- आपतकालीन अवस्थामा प्रहरी, सशस्त्र प्रहरी, नेपाली सेना वा स्थानीय प्रशासनलाई तत्काल खबर गर्नुपर्नेछ।
बर्दिया जिल्लाबासी सबैलाई यस सूचना गम्भीरतापूर्वक पालन गर्न हार्दिक अनुरोध गर्दछौँ। प्रकोप नियन्त्रण र क्षति न्यूनीकरण प्रशासनको मात्र जिम्मेवारी नभई सबैको साझा दायित्व हो। सुरक्षित रहनुहोस्, अरूलाई पनि सचेत गराउनुहोस्, प्रशासनसँग सहकार्य गर्नुहोस्।